Anak ng Barangay Tanod at Kasambahay, Nagtapos Bilang Cum Laude!


Isang anak ng isang kasambahay at isang barangay tanod ang buong pagmamalaking ibinahagi kung paano niya nagawang tapusin ang kanyang pag-aaral at makapagtapos ng latin honors sa International Peace Leadership College sa Tanay, Rizal. Ayon sa 21-anyos na si Jhonrick Art Catindoy Orense na nag-apply siya ng scholarship at naghanap ng mga paraan para kumita ng pera para mabayaran niya ang mga pangangailangan sa paaralan nang hindi humihingi ng pera sa kanyang mga magulang.

“Gumagawa din po ako logo ng mga student organizations, paintings like murals, tapos minsan nagju-judge at nagiging speaker din po ako ng mga workshops,” ani ni Jhonrick.

Ayon kay Jhonrick, ang kanyang mga magulang ang kanyang inspirasyon para makapagtapos ng pag-aaral.

“I finished my college kasi ayoko nang maulit yung mga moment na walang laman ‘yung bigasan namin. Asin ‘yung ulam ni tatay at baon niya sa trabaho tapos si inay kamatis lang at kape,” pagbabahagi ni Jhonrick.

Si Jhonrick, na consistent honor student mula noong high school, ay nagtapos ng cum laude ng Bachelor of Arts degree in Journalism noong Linggo. Makikita sa larawan ang lahat ng mga medalyang naipon ni Johnrick sa paglipas ng mga taon.

“This is not to boast my achievements. Rather, I am posting this to inspire and motivate everyone who think they can’t. Just like you, I am just an ordinary person but I chose to do things extraordinarily,” dagdag pa niya.